نوید انصاری کے سلسلۂ جنبانی کے پُر مسرت ماحول سے متاثر ہو کر اُن کے چچا حمید شمیم انصاری نے یہ سہرا لِکھا ہے
جو اگست ۲۰۲۴ کو پیش کیا جائے گا انشااللہ
چمکا ہے سرِ محفل وہ رشکِ قمر سہرا
پیمانِ محبت کا گویا ہے ثمر سہرا
تاروں کو تجسس ہے یہ کِس کے ہے سر سہرا
مہتاب کہاں پنہاں نوشا ہے کدھر سہرا
مسند پہ نوید آیا ہے یا چاند اُتر آیا
کیا بزم کے جلوے ہیں تا حدِ نظر سہرا
کلیاں ہیں بڑی بیکل پھوُلوں کے بھی ارماں ہیں
دولھا کے گلے لگ کر ہوں راہِ نذر سہرا
ہر آنکھ یہاں ساحر ہر دِل ہے یہاں مسحور
وہ دِل ہو کہ دیدۂ دِل ہے زیرِ سحر سہرا
کیا نازِ عروسی ہے کیا ناوکِ مژگاں ہے
کُچھ سوئے نظر نوشا کُچھ جانبِ در سہرا
جادو ترے بندھن کا سر چڑھ کے وہ یوُں بولا
پڑھتے ہیں کنوارے بھی اب شام و سحر سہرا
شیرینیٔ چاہت میں گھُلتی ہے شبِ جاناں
کھِلتی ہے عروُسِ صُبح جاتا ہے نِکھر سہرا
سرشار خوُشی سے ہے پھوُلی نہ سماتی ہے
ہو کیوں نہ فرح نازاں بھائی کے ہے سر سہرا
مغلوُب رضی بھی ہیں بیٹے کی محبت میں
بُشریٰ کی مسرت کے اشکوں سے ہے تر سہرا
کہتے ہیں کہ گھر جنت دُلہن ہی کے دم سے ہے
فردوسِ گُماں دوُلھا فردوسِ نظر سہرا
جب پیار کریں دو دِل آسان ہو ہر منزل
ساتھی ہو اگر جیا رہبر ہو اگر سہرا
ابا کی تمنّا ہے امی کی دعائیں ہیں
ہر کام کی عظمت کا ہو تیرے ہی سر سہرا
اللہ کی رحمت کے سائے میں رہو ہر دم
تُم عمرِ خِضر پاؤ ہو راہِ سفر سہرا
سہرے کی سبھی لڑیاں شعروں سے عبارت ہیں
اشعار ہیں گُلدستہ خوُشبو ہے مگر سہرا
